_{دوشنبه, 24 غويی}

ګڼو امریکايي چارواکو په دې موخه په جوړو شویو مراسمو کې برخه اخیستې ده.

دا په داسې حال کې ده، چې اسراییلو ځواکونو بیا د دوشنبې ورځ د غزې پر پوله لسګونه زره فلسطینیانو سره په اخ و ډب تیره کړه.

د فلسطین روغتیا وزارت وايي، اسراییلي ځواکونو د غزې پر پوله ۴۲ فلسطیني اعتراض کوونکي وژلي او تر یو زر او ۷ سوو ډیر نور ټپیان کړې دي.

اسراییلو ځواکونو ددغه هیواد د تاسیس کلیزه او په بیت المقدس کې د امریکا د سفارت د پرانیستل کیدو ورځ د فلسطینیانو په وژلو تیره کړه.

امریکا د دوشنبې پر ورځ، چې د اسراییلو د تاسیس له اوویایمې کلیزې سره برابره وه، رسمآ خپل سفارت بیت المقدس کې پرانیست.

د امریکا د سفارت د پرانیستې مراسمو کې د ډونلډ ټرمپ د لور ایوانکا او زوم جارېد کوشنر په ګډون ګڼو امریکايي چارواکو برخه اخیستې.

د امریکا دغه ګام اسراییل خوشاله کړي، خو فلسطینیانو بیا هغه په پراخو اعتراضونو بدرګه کړی دی.

لسګونو زرو فلسطینیانو پر دې ورځ د غزې سرحدي سیمو کې اعتراضونه پیل کړي دي.

د فلسطین روغتیا وزارت وايي اسراییلو پر دغو اعتراض کوونکو ډزې کړي، چې تر اوسه پکې لسګونه کسان وژل شوي او سلګونه نور ټپیان دي.

سرچینه زیاتوي، چې د اسراییلي ځواکونو د ډزو په قربانیانو کې ګڼې ښځې او ماشومان هم شامل دي.

فلسطینیان ختیځ بیت المقدس او لویدیزه غاړه، چې اسراییلو د ۱۹۴۸ کال د جګړې پر مهال نیولي، د خپلې خاورې برخه ګڼي.

په مصر، سوریه، اردن او نورو ګاونډیو هیوادونو کې میشتو فلسطیني کډوالو هم په دې ورځ د اسراییلو پر خلاف لاریونونه کړې دي.